"Atalanta" "Bavariya"dan uchralgan 1:6 hisobidagi mag'lubiyatdan so'ng murabbiyi borasida qaror qabul qildi

«Atalanta» rahbariyati jamoa bosh murabbiyi Raffaele Palladino bilan amaldagi shartnomani uzaytirish niyatida.

TuttoMercatoWEB nashrining xabar berishicha, Chempionlar ligasi 1/8 finalining ilk bahsida Myunxenning «Bavariya» klubidan uchralgan yirik (1:6) mag'lubiyatga qaramay, Bergamo klubi murabbiy bilan yangi bitimni muhokama qilishni rejalashtirmoqda. Yangi shartnoma 2029 yilning yoziga qadar mo'ljallanishi kutilmoqda. «Atalanta» mutasaddilari Palladinoni klub loyihasini rivojlantirish uchun eng munosib nomzod deb hisoblamoqdalar.

Raffaele Palladinoning «Atalanta» bilan hozirgi shartnomasi 2026/27 yilgi mavsum yakunigacha amal qiladi. U jamoani 2025 yilning noyabr oyida Ivan Yurich iste'fosidan so'ng qabul qilib olgan edi. Fevral oyi yakunlariga ko'ra, Palladino «Kremoneze», «Latsio» va «Napoli» ustidan qozonilgan g'alabalardan so'ng A Seriyada oyning eng yaxshi murabbiyi deb topilgan edi.