Tudor "Tottenxem"ni "Liverpul"ga qarshi o'yinga tayyorlaydi

Igor Tudor boshqaruvi ostida "Tottenxem" barcha to'rtta o'yinda imkoniyatni boy berdi, jumladan, seshanba kuni Chempionlar Ligasi doirasida "Atletiko"ga qarshi kechgan bahsda (2:5) mag'lub bo'ldi. London klubi rahbariyati yuzaga kelgan vaziyatdan xavotirda, biroq yaqin kunlar ichida jamoa murabbiylar shtabida o'zgarish bo'lishi kutilmayapti.

ESPN nashrining xabar berishicha, aynan Tudor "Tottenxem"ni Premer-liga doirasidagi "Liverpul"ga qarshi kechadigan safar o'yiniga tayyorlaydi. Jamoalar yakshanba kuni, 15 martda o'zaro to'qnash kelishadi.

Hozirda "Tottenxem" Angliya chempionati turnir jadvalida 16-o'rinni egallab turibdi. "Shporlar" xavfli hududni atigi bir ochkoga ortda qoldirmoqda. Eslatib o'tamiz, Igor Tudor fevral oyida — Tomas Frank iste'foga chiqarilganidan ko'p o'tmay London jamoasini qabul qilib olgan edi.