"Bavariya"ning g'alabasi qimmatga tushdi: Uch nafar asosiy futbolchi jarohat oldi

"Bavariya" o'zining rasmiy saytida bir nechta futbolchisining jarohat olgani haqida ma'lumot joylashtirdi. Unga ko'ra, Myunxen klubining lazaretidan darvozabon Yonas Urbig, himoyachi Alfonso Devis va hujumkor yarim himoyachi Jamal Musiala joy oldi. Ushbu futbolchilarning barchasi Chempionlar Ligasi doirasida "Atalanta"ga qarshi kechgan (6:1 hisobidagi g'alaba) o'yinda ishtirok etishgan edi.

Urbigda bosh miya chayqalishi, Devisda o'ng oyoq tizza osti paylari mushaklari cho'zilishi aniqlangan. Musialada esa o'tgan yozda orttirilgan to'piq jarohatining asorati kuzatilgan. "Bavariya" futbolchilarning tiklanish muddatlari haqida hozircha ma'lumot bermadi.

Eslatib o'tamiz, Yonas Urbig Bergamodagi o'yinda asosiy darvozabon Manuel Noyerning jarohati sababli "Bavariya" darvozasini qo'riqlagan edi.