Yulian Nagelsmann "Manchester Yunayted"ni boshqarishi qiyin: Asosiy sabablar ma'lum bo'ldi

Germaniya terma jamoasi bosh murabbiyi Yulian Nagelsmann faoliyatini "Manchester Yunayted"da davom ettirishi dargumon. Bu haqda Manchester Evening News jurnalisti Stiven Reylston xabar bermoqda.

Manba bergan ma'lumotlarga ko'ra, nemis mutaxassisining mankunianliklar bosh murabbiyi lavozimiga tayinlanishi ehtimoli past, chunki uning Germaniya futbol ittifoqi (DFB) bilan amaldagi mehnat shartnomasi 2028 yil yoziga qadar mo'ljallangan. Yozda murabbiy terma jamoa bilan Jahon chempionatida band bo'ladi, bu esa unga ingliz klubining mavsumoldi tayyorgarligiga to'liq e'tibor qaratish imkonini bermaydi. "Manchester Yunayted" esa jamoaning yangi murabbiyi masalasiga imkon qadar tezroq oydinlik kiritish niyatida, shu sababli yozgacha kutish bu vaziyatda to'siq bo'lishi mumkin.