Osiyo Kubogi kundaligi, 14-kun. Hech kimda qo'rquv yo'q, yaponlardan cho'chimaymiz ham!

O'zbekiston  milliy terma jamoasi Al-Aynda Yaponiyaga qarshi o'yinga tayyorgarlik olib bormoqda. Kuper futbolchilarni Yaponiyaga qarshi "jangovar" ruhiyatda tayyorlamoqda.

Hech kimda qo'rquv yo'q, raqibdan cho'chish ham yo'q. Chempion bo'lmoqchimizmi? Marhamat! Yaponiya, Eron, Janubiy Koreya, Avstraliya kabi terma jamoalarga baribir duch kelamiz bu yo'lda. Shu sababdan ularga qarshi o'ynashni, ularni yutishni o'rganishimiz kerak. Ilojsiz narsaning o'zi yo'q!

Mashg'ulotlar bugun qiziqarli o'tdi. Futbolchilar yaxshi kayfiyatda mashg'ulot olib bordi. Bizning mashg'ulot bo'lib o'tayotgan maydonning yonginasida Avstraliya – Suriya uchrashuvi bo'lib o'tdi. Stadionning shovqini shundoq eshitilib turdi.

Shovqinga qarab, kim hujum qilayotgani-yu, qaysi jamoa gol urganini o'zimiz uchun aniqlab turdik. Suriyani qo'llab-quvvalashga juda ko'plab muxlislar tashrif buyurganini ta'kidlab o'tish kerak.

Ba'zilar joy etmaganidan, hattoki, stadion yonidagi adirni ustiga chiqib, o'yinni tomosha qildi. Mana sizga muxlislik!

Suriya Avstraliyadan mag'lubiyatga uchrab, musobaqani tark etdi. Lekin muxlislar bu jamoadan xafa bo'lishmasin. Suriyaliklar astoydil harakat qildi, maydonda bor kuchlari bilan to'p surdi. Yaponiyalik jurnalistlar mashg'ulotni alohida qiziqish bilan kuzatdi.

15 daqiqadan keyin mashg'ulotni tark etishni so'raganimizda ham, ortiqcha e'tiroz bildirmay, jilmayib, ta'zim qilgancha chiqib ketishdi. Kuper o'zbekistonlik jurnalistlarga esa mashg'ulot oxiriga qadar maydonda qolishga ruxsat berdi.

Shuncha yo'l bosib, bizni qo'llab-quvvatlash uchun kelishgan ekan, 15-daqiqadan keyin chiqarib yuborsak, chiroyli ish qilmagan bo'lamiz, dedi Kuper. “Faqat bizga halaqit qilishmasa bo'lgani!”.

Albatta, o'zimizning jurnalistlar terma jamoaga halaqit qilgani yo'q. Ular ham bir oila bo'lib, bizga yordam berishga, o'z maqolalari, materiallari bilan ruhan dalda bo'lishga intilishmoqda.

Xullas, katta g'alabalarni istar ekanmiz, birlashishimiz kerak. Birlashishimiz zarur! Turli shaxsiy manfaatlar, g'arazlar, hasadlarni yig'ishtirib qo'yib, qo'lni qo'lga berib ishlashimiz kerak. Shunda kerakli natija ham uzoq kutilmaydi!

Yoqubjon Bobojonov, O'FA Matbuot xizmati

Al-Ayn, BAA