Superliga, 4-tur. «Nasaf» — «Surxon» Samarqandda, «So'g'diyona» — «Paxtakor» Toshkentda o'tkaziladi

Superliganing 4-turi doirasidagi «Nasaf» — «Surxon» uchrashuvi Samarqand shahridagi «Dinamo» stadionida bo'lib o'tadi.

Ma'lumki, «Nasaf» jamoasi uy uchrashuvlarini G'uzordagi Markaziy stadionda o'tkazib kelayotgan edi. Biroq, hozirda G'uzor shahridagi Markaziy stadion Superliga uchrashuvlarini qabul qilish uchun talab darajasiga javob bermaydi. Shu bois «Nasaf» klubi Superliganing 4-turidan o'rin olgan uchrashuvini «Dinamo» stadionida o'tkazish bo'yicha shartnoma imzolab, Ligani xabardor qildi. Uchrashuv taqvimga muvofiq 20 mart kuni bo'lib o'tadi.

Shuningdek, Jizzaxning «So'g'diyona» klubi «Paxtakor»ga qarshi 4-tur uchrashuvini Toshkentdagi «Paxtakor» stadionida o'tkazish bo'yicha Ligaga rasmiy murojaat yo'lladi. Ma'lumot uchun, «So'g'diyona» jamoasi uy o'yinlarini Zomindagi stadionda o'tkazishni rejalashtirgan edi. Biroq, ayni paytda stadionda Superliga talablariga mos holatga keltirish maqsadida qurilish va ta'mirlash ishlari olib borilmoqda.

Shu sababli «So'g'diyona» — «Paxtakor» uchrashuvi, avval belgilanganidek, 20 mart kuni o'tkaziladi. Bunda «So'g'diyona» jamoasi rasman mezbon maqomida maydonga tushadi.

Shuningdek, jamoalarning ikkinchi davradagi o'zaro uchrashuvi ham taqvimga ko'ra «Paxtakor» stadionida o'tkaziladi va unda «Paxtakor» mezbon sifatida ishtirok etadi.