Livramento «Barselona»ga qarshi o'ynaydimi? Eddi Xau futbolchining holati haqida gapirdi

«Nyukasl» bosh murabbiyi Eddi Xau «Barselona»ga qarshi o'yinda Tino Livramentoning asosiy tarkibda maydonga tushishi mumkinligi haqida o'z fikrlari bilan o'rtoqlashdi. Avvalroq himoyachi ikki oylik tanaffusga sabab bo'lgan jarohatidan so'ng mashg'ulotlarga qaytgan edi.

«Hozircha u asosiy tarkibda tushish uchun etarlicha jismoniy holatda ekaniga 100 foiz amin bo'lishim uchun kam mashg'ulot o'tkazdi, ayniqsa, shunday muhim o'yin oldidan. Biroq u biz bilan birga. Har bir o'yinchi asosiy tarkibdan joy olishga da'vogarlik qilishi mumkin. Tino biz uchun muhim va uning safga qaytgani juda soz», — deya Xauning so'zlarini keltiradi «zag'izg'onlar» matbuot xizmati.

Ushbu mavsumda Livramento barcha musobaqalarda 20 ta uchrashuvda ishtirok etdi va o'z hisobiga bitta golli uzatmani yozdirib qo'ydi.