Osiyo Kubogida qatnashgan eronlik futbolchi qizlar politsiya yordamida jamoadan qochib ketgan — manba

Eron ayollar terma jamoasining besh futbolchisi Avstraliyadagi Osiyo Kubogi vaqtida jamoa ixtiyoridan qochib ketdi. Jamoa guruh bosqichining so'nggi o'yinida Filippin terma jamoasiga 0:2 hisobida imkoniyatni boy berdi va “A” guruhida so'nggi o'rinni egallab, turnirni tark etdi.

Avvalroq Eron davlat televideniesi boshlovchisi Mohammad Rizo Shahbozi Osiyo Kubogidagi dastlabki o'yinida milliy madhiyani kuylamagan futbolchilarni keskin tanqid qilgan edi.

“Urush paytida sotqinlarga nisbatan qattiqroq munosabatda bo'lish kerak”, degan edi u.

Ushbu voqeadan so'ng Professional futbolchilar assotsiatsiyalari xalqaro federatsiyasi (FIFPro) FIFA va Osiyo Futbol Konfederatsiyasidan (OFK) futbolchi qizlarning xavfsizligini ta'minlashni so'ragan.

“The Athletic” nashrining xabar berishicha, hozirda FIFA, OFK va Avstraliya hukumati qizlarning xavfsizligini ta'minlash maqsadida Eron ayollar terma jamoasining mamlakatda qolish muddatini uzaytirish masalasini muhokama qilmoqda. Ayni damda jamoa uchun ortga qaytish reysi band qilinmagan.

Shuningdek, Filippin bilan o'yindan so'ng Eronning besh nafar futbolchisi mehmonxonadan qochib ketgani ta'kidlanmoqda. Qizlarga jamoa qarorgohini tark etishda politsiya yordam bergan. Sportchilar 9 mart, dushanba kuni terma jamoaning rejalashtirilgan kechki ovqatida ishtirok etmagan. Hozirda qochib ketgan futbolchilar Avstraliya federal politsiyasi nazorati ostidagi xavfsiz joyda saqlanmoqda.