Messi nima uchun «Barsa»ga qaytmagan edi? Laporta 2023 yildagi voqealar tafsilotini ochiqladi

«Barselona» prezidenti Joan Laporta Lionel Messining amalga oshmay qolgan qaytishi bilan bog'liq vaziyatga izoh berdi.

Yaqindagina «ko'k-anorranglilar»ning sobiq murabbiyi Xavi Ernandes intervyu berib, unda Laportaning o'zi 2023 yilda, kelishuv deyarli imzolanish arafasida turganda argentinalik yulduzning qaytishini rad etgani haqida so'zlab bergan edi.

«2023 yilda Xavi oldimga kelib, Messi unga qaytish istagi borligini aytganini bildirdi. U mendan Xorxe Messiga [futbolchining otasi] taklif yuborish uchun shartnoma tayyorlashni iltimos qildi. Bu taxminan mart oyining o'rtalarida sodir bo'lgandi. Ammo may oyida Xorxe Messining o'zi oldimga keldi va o'g'lining «Barsa»ga qaytishi imkonsiz ekanini, chunki ular «Inter Mayami»ni tanlashganini aytdi. Men esa ularning qarorini hurmat qilishimni va to'liq qabul qilishimni bildirdim», — deya Laportaning so'zlaridan iqtibos keltirmoqda BarcaTimes.

Lionel Messi o'sha 2023 yilning yozida «PSJ»dan erkin agent maqomida «Inter Mayami»ga ko'chib o'tgan edi.