"Barselona"ning 8 ta o'yindan buyon gol ura olmayotgan Ferran Torres bo'yicha pozitsiyasi ma'lum bo'ldi

«Barselona» hujumchisi Ferran Torres so'nggi o'yinlarda qiyinchiliklarga duch kelmoqda. 26 yoshli futbolchi ketma-ket sakkizta uchrashuvdan beri raqiblar darvozasini ishg'ol eta olmayapti. La Liga doirasida «Atletik» Bilbaoga qarshi kechgan yaqindagi bahsdan so'ng, «ko'k-anorranglilar» bosh murabbiyi Xans-Diter Flik Torresning «quruq» seriya fonida o'ziga bo'lgan ishonchni yo'qotganini tan oldi.

Shunday bo'lsa-da, Diario Sport nashrining xabar berishicha, «Barselona» rahbariyati hamon hujumchiga to'liq ishonishda davom etmoqda. Klubdagilar o'yinchi avvalgi darajasiga qaytishiga va yana sermahsulligi bilan muxlislarni xursand qilishiga shubha qilishmayapti.

Ferran Torres joriy mavsumda kataloniyaliklar safida barcha musobaqalarda jami 37 ta o'yinda maydonga tushib, 16 ta golni o'z hisobiga yozdirib qo'ygan.