"Al-Ahli" o'z yulduzlarining oilalarini Dubaydan Jiddaga ko'chirmoqda

Saudiyaning «Al-Ahli» klubi mamlakat Sport vazirligi ko'magida ayrim yulduz futbolchilarining oilalarini Dubaydan Jiddaga ko'chirishga qaror qildi. Bu haqda jurnalist Ben Jeykobs xabar bermoqda.

Uning ma'lumotlariga ko'ra, ba'zi o'yinchilarning oilalari vaqtini navbat bilan BAA va Saudiya Arabistonida o'tkazib kelishmoqda. Oilalarni Dubaydan olib chiqish qarori mintaqada ortib borayotgan siyosiy keskinlik fonida ehtiyot chorasi sifatida qabul qilindi.

28 fevral kuni Isroil mudofaa armiyasi Eronga «oldindan ogohlantiruvchi» zarba berilganini ma'lum qilgan edi. AQSh Prezidenti Donald Tramp ushbu hujumda AQSh ishtirok etganini tasdiqladi. Ko'p o'tmay, Eron Isroilga javob qaytardi. Hozirgacha davom etayotgan harbiy harakatlar, jumladan, Dubayga ham ta'sir ko'rsatdi.

Eslatib o'tamiz, hozirda «Al-Ahli» sharafini Riyod Mahrez, Ayven Touni, Eduar Mendi, Frank Kessie va boshqa mashhur futbolchilar himoya qilmoqda.