«Atletiko» sport direktori Grizmannni MLSga ketishi mumkinligi haqidagi xabarlarga munosabat bildirdi

Madridning «Atletiko» klubi sport direktori Mateu Alemani hujumchi Antuan Grizmannning MLSdagi «Orlando Siti» jamoasiga o'tishi haqidagi mish-mishlariga izoh berdi.

«Grizmann bizning jamoada qoladi», — dedi Alemani. Uning so'zlarini jurnalist Fabritsio Romano X ijtimoiy tarmog'ida keltirdi.

Ta'kidlanishicha, Amerika klubi frantsiyalik futbolchini yozda erkin agent sifatida safiga qo'shib olish ustida hali ham ish olib bormoqda.

34 yoshli Grizmann madridliklar tarixidagi eng yaxshi to'purar hisoblanadi — u 210 ta gol urgan. Joriy mavsumda futbolchi barcha turnirlar doirasida 38 ta o'yinda ishtirok etib, 12 ta gol va 2 ta golli uzatmani o'z hisobiga yozdirdi. Uning klub bilan amaldagi shartnomasi 2027 yil yozigacha mo'ljallangan.