"MYu" yulduzi jamoada o'zini ko'rsatishga bel bog'ladi

«Manchester Yunayted»ning hujumkor yarim himoyachisi Meyson Maunt, tarqalgan mish-mishlarga qaramay, klubini o'zgartirishni rejalashtirmayapti. Bu haqda Football Insider nashri ma'lumot bermoqda.

Manbaning xabariga ko'ra, Maunt shu yozda «Manchester Yunayted»dan ketishga harakat qilmoqchi emas, chunki u joriy mavsumda o'zini ancha ishonchli his qilmoqda. Mauntning jarohatlar bilan bog'liq muammolari barchaga ma'lum, biroq ushbu mavsumda u o'tgan yillardagiga qaraganda ancha kam o'yinni o'tkazib yubordi.

Joriy mavsumda 27 yoshli yarim himoyachi barcha turnirlarni hisobga olgan holda 19 ta o'yinda ishtirok etdi, 3 ta gol urdi va bitta golli uzatmani amalga oshirdi.

Mauntning «Manchester Yunayted» bilan amaldagi shartnomasi 2028 yilning o'rtalariga qadar mo'ljallangan. Transfermarkt ekspertlari xavbekning bozor qiymatini 32 million evroga baholashmoqda.