Assistlar bo'yicha «mashina»ga aylangan futbolchiga narx belgilandi

Dortmundning «Borussiya» klubi o'ng qanot himoyachisi Yulian Ryuerson kelayotgan yozda jamoasini o'zgartirishi mumkin.

Yuzaga kelgan murakkab moliyaviy holat «asalarilar»ni mavsum yakunlanganidan so'ng bir nechta futbolchilar bilan xayrlashishga majbur qilishi mumkin. «Sport Bild» nashrining ma'lumotlariga ko'ra, agar Ryuerson uchun 30 million evrodan boshlanuvchi taklif tushsa, dortmundliklar rahbariyati uni sotishga rozilik beradi. Avvalroq norvegiyalik futbolchiga «Barselona» qiziqish bildirayotgani aytilgan edi, shuningdek, da'vogarlar qatorida Angliyaning «Nyukasl» va «Manchester Yunayted» klublari ham tilga olingan.

«Transfermarkt» portali 28 yoshli lateralning qiymatini 20 million evroga baholamoqda. Joriy mavsumda futbolchi «Borussiya» safida barcha turnirlarda 32 ta o'yinda maydonga tushib, o'z hisobiga 14 ta golli uzatmani yozdirib qo'ydi.