«Prague Masters». Nodirbek Abdusattorov so'nggi tur oldidan yaqqol peshqadamga aylandi (videosharh)

Chexiya poytaxti Praga shahrida shaxmat bo'yicha «Prague Chess Festival» turniri yakuniga etib qoldi. Bugun musobaqada so'nggi — 9-tur o'yinlari o'tkaziladi.

Musobaqaning «Masters» guruhida ishtirok etayotgan o'zbekistonlik ikki shaxmatchi — Nodirbek Abdusattorov va Nodirbek Yoqubboev kecha 8-tur o'yinlarida ishtirok etishdi.

Abdusattorov ushbu turda o'zi kabi 4,5 ochko jamg'argan holda 2-3-o'rinlarni bo'lishib turgan mezbon shaxmatchisi David Navaraga qarshi qora donalarda o'ynadi. Raqiblar butun o'yin davomida yuqori aniqlikda harakat qilishdi va Endshpilda mutlaqo teng vaziyatda etib kelishdi. 53-yurishda esa Navara qo'pol xatoga yo'l qo'ydi. Hamyurtimiz raqibni bu xato uchun tezda jazolagan holda raqibning Filini qo'lga tushirdi. Oqibatda, Abdusattorovning doskada qolgan yagona piyodasi Farzinga chiqishi aniq bo'ldi hamda David Navara 64-yurishda taslim bo'ldi.

Ushbu g'alaba evaziga Nodirbek Abdusattorov o'z ochkolarini 5,5 taga etkazdi va musobaqada 1-pog'onasiga ko'tarilib oldi. Boisi, shu turgacha peshqadam bo'lib kelgan niderlandiyalik Yorden van Forest kecha hindistonlik Aravind Chitambaramga yutqazib qo'ydi.

Nodirbek Yoqubboev 8-tur doirasida eronlik Parham Maqsudlu bilan durang o'ynadi hamda 3,5 ochko bilan 8-pog'onani band etib turibdi.

Abdusattorov bugun AQShlik Xans Nimann Mouk bilan oq donalarda, Yoqubboev esa germaniyalik Vinsent Keymerga qarshi qora donalarda o'ynaydi. Bahslar Toshkent vaqti bilan 15:00da boshlanadi.