«Tottenxem»da tarixiy inqiroz: Klub 50 yildan beri bunday yomon natija qayd etmagan edi

Londonning «Tottenxem» klubi Angliya chempionati 29-turining so'nggi o'yinini muvaffaqiyatsiz o'tkazdi. «Shporlar» bahs davomida hisobda oldinga chiqib olgan bo'lsalar-da, tez orada maydonda bir kishi kam bo'lib qolishdi, ketidan esa birinchi bo'lim yakunida o'z darvozalaridan bir yo'la uchta to'p olib chiqishdi.

Bu Angliya chempionati doirasida «Tottenxem» g'alaba qozona olmayotgan ketma-ket o'n birinchi o'yin bo'ldi.

Klubda bu qadar omadsiz seriya yarim asrdan ko'proq vaqtdan beri kuzatilmagan edi. Oxirgi marta «Tottenxem» 1975 yilning avgust-oktyabr oylari oralig'ida chempionatda qatorasiga 11 o'yinda g'alaba qozona olmagan.

Angliya chempionati doirasidagi navbatdagi uchrashuvda «Tottenxem» «Liverpul»ga qarshi maydonga tushadi.