«Milan»ga o'tishi barbod bo'lgan Frantsiya terma jamoasi hujumchisi safga qaytishga yaqin

Frantsiya terma jamoasi va Angliyaning «Kristal Pelas» klubi hujumchisi Jan-Filipp Mateta tizzasidagi jarohatdan so'ng tiklanishga yaqin turibdi. Bu haqda «burgutlar» bosh murabbiyi Oliver Glasner «Tottenxem» bilan o'yin oldidan o'tkazilgan matbuot anjumanida ma'lum qildi.

28 yoshli futbolchi kelasi haftada mashg'ulotlarga qaytadi va katta ehtimol bilan Konferentsiyalar ligasi 1/8 finalining birinchi o'yinida maydonga tushishga tayyor bo'ladi.

«Biz kelasi dushanba kuni Matetaning jamoaviy mashg'ulotlarga qisman qaytishini rejalashtirmoqdamiz. U payshanba kuni «Larnaka»ga qarshi o'yinni asosiy tarkibda boshlamaydi, biroq 15–20 daqiqa o'ynashi mumkin», — dedi Glasner.

«Hamma jismoniy muammoni jarrohlik amaliyotisiz hal qilishga harakat qilmoqda. Umumiy fikrga ko'ra, operatsiyasiz, konservativ davolanishni sinab ko'rish eng yaxshi yo'ldir», — deya qo'shimcha qildi murabbiy.

Eslatib o'tamiz, avvalroq Mateta sog'lig'idagi muammolar (tibbiy ko'rikdan o'ta olmagani) sababli «Milan»ga o'ta olmagan edi.