"Selta" bilan o'yin oldidan "Real" tarkibida jiddiy muammolar yuzaga keldi

Jurnalist Abraxam Romero "Real"ning jarohat olgan futbolchilari holati haqidagi yangiliklar bilan bo'lishdi.

Xabar qilinishicha, tizzasini tekshiruvdan o'tkazgan Kilian Mbappe ayni damda "Real" murabbiylari bilan birga Parijda bo'lib turibdi va juma kuni qaytadi.

Jud Bellingem esa, o'z navbatida, sonidagi jarohat bo'yicha boshqa mutaxassisdan qo'shimcha xulosa olish uchun Londonda bo'lib turibdi.

Eduardo Kamavinga hamon kuchli tish og'rig'idan aziyat chekmoqda.

Raul Asensio umurtqa pog'onasining bo'yin qismi boylamlari cho'zilishidan so'ng sog'ayish jarayonini o'tamoqda. Boldir mushaklarida muammo sezayotgan David Alabaning "Selta"ga qarshi o'yinda ishtirok etishi esa so'roq ostida qolmoqda.

"Madrid" juma kuni La Liganing 27-turi doirasida safarda "Selta" mehmoni bo'ladi.