Brunu Fernandesh «Manchester Yunayted»ning APL tarixidagi rekordiga yaqinlashdi

«Manchester Yunayted» sardori Brunu Fernandesh Premer-liganing 29-turida «Nyukasl Yunayted»ga qarshi o'yinda (1:2) golli uzatma amalga oshirdi va ushbu ko'rsatkich bo'yicha klub tarixidan o'rin oldi.

Opta Sports telegram-kanali ma'lumotiga ko'ra, ushbu assist portugaliyalik futbolchi uchun joriy APL mavsumidagi 14-golli uzatma bo'ldi. «Qizil iblislar» safida Premer-liga bir mavsumida bundan ko'proq assistni faqat Devid Bekxem amalga oshirgan — u 1999/2000 yilgi mavsumda 15 ta golli uzatma qayd etgan.

Joriy mavsumda Fernandesh barcha musobaqalarda 28 ta o'yinda ishtirok etib, 7 ta gol va 15 ta golli uzatma muallifi bo'ldi. Uning klub bilan amaldagi shartnomasi 2027 yil yoziga qadar mo'ljallangan. Transfermarkt portali ma'lumotiga ko'ra, futbolchining bozor qiymati 40 million evroni tashkil etadi.