O'tkir Yusupov: “Chempionlik uchun barchamiz bir yoqadan bosh chiqarib kurashamiz

O'zbekiston Superligasining 2-turidan o'rin olgan “Navbahor” – “Buxoro” jamoalari o'rtasidagi uchrashuv arafasida “lochinlar”ning tajribali sardori O'tkir Yusupov bo'lajak o'yin haqidagi fikrlari bilan o'rtoqlashdi.

- Bo'lajak raqibimiz – “Buxoro” tartibli futbol namoyish etadigan jamoa bo'lsa, buxoroliklar ustozi Aleksandr Xomyakov yaxshi mutaxassis, o'z ishining ustasi. Bundan tashqari, har ikki jamoa ilk turda zafar quchdi va shu bois, futbolchilarda kayfiyat a'lo darajada.

Bo'lajak bellashuvda maydonga g'alaba ishtiyoqi, ishqibozlarga quvonch ulashish maqsadida tushib, zafar quchish uchun barcha imkoniyatimizni ishga solamiz.

Ta'kidlash joizki, biz muxlislar uchun o'ynaymiz, ularni xursand etish, chempionlik unvonini qo'lga kiritish uchun bir yoqadan bosh chiqarib kurashamiz.

Ishqibozlardan esa doimo jamoamizni qo'llab-quvvatlab, g'alabamizga madadkor bo'lishlarini tilayman. Baxtimizga muxlislar doimo sog'-salomat bo'lishsin, - dedi O'tkir Yusupov.