"MYu" afsonasi: "Bu safar titulni hech kimga bermasa ham bo'laveradi"

"Manchester Yunayted"ning afsonaviy sobiq yarim himoyachisi Pol Skoulz Angliya Premer-ligasining joriy mavsumidagi chempionlik poygasi haqida o'z fikrini bildirdi.

Hozirgi vaqtda turnir jadvalini 64 ochko jamg'argan "Arsenal" boshqarib bormoqda. Ikkinchi o'rinda esa bitta zaxira o'yiniga ega bo'lgan va peshqadamdan besh ochko ortda qolayotgan "Manchester Siti" bormoqda.

"Agar ushbu ikki jamoadan birini tanlash kerak bo'lsa, men "Manchester Siti"ni aytgan bo'lardim. Biroq bu mavsumda umuman titulni topshirish kerakmikan, deb ikkilanib qolaman. Bilaman, kim g'alaba qozonsa ham, odamlar doim g'olibni bunga loyiq deb atashadi, lekin bu safar hech qaysi jamoa meni ishontira olmayapti. Hech kim chempionlikka loyiqdek ko'rinmayapti", – dedi Skoulz The Good, The Bad & The Football podkastida.

Bundan oldin sobiq xavbek "Arsenal" "Premer-liga tarixidagi eng yomon chempion"ga aylanishi mumkinligini ta'kidlagan edi.