Flik Ispaniya Kubogidan chiqib ketgach, jamoaning Evropa va ichki chempionatdagi maqsadlari haqida gapirdi

Seshanba kuni «Barselona» Ispaniya Kubogi yarim finalining javob uchrashuvida «Atletiko»ni 3:0 hisobida mag'lub etgan bo'lsa-da, musobaqani tark etdi.

«Matraschilar» dastlabki bahsda qo'lga kiritilgan to'rtta to'p farqini saqlab qolishdi. Endi kataloniyaliklar bor e'tiborni Chempionlar ligasi va La Ligaga qaratishlari mumkin.

«Bizni Chempionlar ligasida uzoq yo'l kutmoqda. «Nyukasl» — juda qiyin raqib. Agar Evropada uzoqqa borishni istasak, har bir o'yinga xuddi shunday ishtiyoq bilan yondashishimiz kerak. Biroq hozirda biz bor e'tiborimizni Bilbaoning «Atletik» jamoasiga qarshi bo'lajak uchrashuvga qaratganmiz», — dedi «Barselona» bosh murabbiyi Xans-Diter Flik matbuot anjumanida.

«Ko'k-anorranglilar»ning «Atletik» bilan bahsi 7 mart kuni bo'lib o'tadi, Chempionlar ligasi 1/8 finali doirasidagi «Nyukasl»ga qarshi dastlabki o'yin esa uch kundan so'ng Angliyada o'tkaziladi.