Ispaniya terma jamoasi bosh murabbiyi Finalissima o'tkaziladigan joyni ko'chirishni taklif qildi

Ispaniya milliy futbol terma jamoasi bosh murabbiyi Luis de la Fuente 2026 yilgi Finalissima o'yini o'tkaziladigan joyni Qatardan ko'chirish kerak, deb hisoblamoqda. U bunga Yaqin Sharqdagi hozirgi vaziyatni sabab sifatida keltirgan.

«Biz muzokaralar olib borilayotganini anglab turibmiz. Jamiyat uchun eng muhim vazifa — mojaroni to'xtatish. Ammo agar biz bu jarayonga tortilib qolsak va u qancha davom etishini bilmasak, shu davr mobaynida [Qatarda] o'ynay olmaymiz. Agar imkoni bo'lsa, uchrashuv o'tkaziladigan joyni ko'chirish eng maqbul qaror bo'lar edi», — dedi de la Fuente. Uning so'zlarini Mundo Deportivo nashri Radio Nacional’ga tayanib keltirmoqda.

Avvalroq Qatar Football Association matbuot xizmati mamlakatdagi barcha futbol musobaqalari o'yinlari noma'lum muddatga qoldirilganini e'lon qilgan edi.