Satriano Ryudiger va Riko o'rtasidagi to'qnashuv haqida: "Men tizza bilan yuzga berilgan zarbani o'z ko'zim bilan ko'rdim" (foto)

"Xetafe" hujumchisi Martin Satriano La Liganing 26-turidan o'rin olgan "Real"ga qarshi o'yinning 1-bo'limida Antonio Ryudiger va Diego Riko ishtirokida yuz bergan vaziyat haqida gapirdi.

Kecha bo'lib o'tgan uchrashuvda "Xetafe" 1:0 hisobida g'alaba qozondi. O'yinning 26-daqiqasida "Xetafe" himoyachisi Diego Riko qanot bo'ylab to'p bilan harakatlanayotganda Arda Gyuler bilan kurashda yiqildi. Keyinroq epizodga qo'shilgan Ryudiger yiqilayotib chap tizzasi bilan raqibining avval elkasiga, so'ngra jag'iga zarba berdi. Riko yuzini ushlagancha qoldi va o'yin to'xtatildi. Hakam Alexandro Munis maydonga shifokorlarni taklif qildi, biroq qoida buzilishini qayd etmadi.

"Men tizza bilan yuzga berilgan zarbani o'z ko'zim bilan ko'rdim. Undan keyin nima bo'lganini esa bilmayman", — dedi Satriano DAZN nashriga bergan intervyusida.