Boks. Usik va Verxuven jangida WBC chempionlik kamari o'rtaga qo'yilmaydi

WBC prezidenti Maurisio Suleyman superog'ir vazn toifasidagi ukrainalik chempion Aleksandr Usik va kikbokschi Riko Verxuven o'rtasidagi jangda tashkilotning asosiy chempionlik kamari o'rtaga qo'yilmasligini ma'lum qildi.

"WBC ushbu krossover-jangni to'liq qo'llab-quvvatlaydi. Bu WBC’ning maxsus tadbiri bo'ladi va biz ushbu bahs uchun Misr ehromlari elementlari tushirilgan ajoyib kamar yaratamiz.

WBC vaqtida Fyuri va Ngannu o'rtasidagi jangni ham qo'llab-quvvatlagan edi va o'sha bahs juda raqobatbardosh ruhda o'tgandi. Biz Rikoni kikboksing bo'yicha superog'ir vazn toifasidagi afsonaviy chempion sifatida juda qattiq hurmat qilamiz.

Hozirgi vaqtda chempionlik kamarini himoya qilish bo'yicha hech qanday muhokama bo'lgani yo'q. Bu shunchaki WBC og'ir vazn toifasi chempioni ishtirokidagi maxsus tadbir hisoblanadi", — dedi Suleyman.

Eslatib o'tamiz, Usik va Verxuven o'rtasidagi jang 23 may kuni Misrda bo'lib o'tadi.