"PSJ" bilan bo'lgan "kambek" qahramoni Serxi Roberto "Barsa" "Atletiko"ni yutishi uchun nima qilish kerakligini aytdi

"Barselona"ning sobiq futbolchisi Serxi Roberto Ispaniya Kubogi yarim finalining bo'lajak javob uchrashuvi haqidagi fikrlari bilan o'rtoqlashdi. Ushbu bahsda kataloniyaliklar Madridning "Atletiko" jamoasini qabul qiladi.

"Matraschilar" dastlabki uchrashuvda 4:0 hisobida yirik g'alabaga erishgan edilar. Final yo'llanmasi taqdiri 3 mart kuni hal bo'ladi.

"Birinchi golni iloji boricha vaqtliroq urish juda muhim. Agar o'yin boshidanoq faol harakat qilib, bosim o'tkazilsa, bu hammani yanada ruhlantirib yuboradi. Shu bilan birga, diqqatni yo'qotmaslik lozim. "Atletiko" qarshi hujumlarda xavfli — ularning oldingi chizig'ida bo'sh hududlardan foydalanishni biladigan yuqori darajali futbolchilar bor. O'yinning boshlanishi hal qiluvchi ahamiyatga ega bo'ladi", — dedi 2024 yilda "Barsa"ni tark etgan, hozirda Italiyaning "Komo" klubida to'p tepayotgan 34 yoshli futbolchi.

Eslatib o'tamiz, aynan Serxi Roberto Chempionlar ligasidagi "PSJ"ga qarshi afsonaviy to'qnashuvda "Barselona"ning hal qiluvchi oltinchi golini kiritgan edi. O'shanda kataloniyaliklar ilk o'yindagi 0:4 hisobidagi mag'lubiyatdan so'ng tarixiy kambek qayd etishgan.