Yaqin Sharqdagi harbiy harakatlar sababli Qatar futboli noma'lum muddatga "muzlatildi"

Qatar futbol assotsiatsiyasi Yaqin Sharqdagi vaziyat keskinlashgani sababli mamlakatdagi barcha musobaqalar to'xtatilganini e'lon qildi. Tegishli xabar tashkilotning X ijtimoiy tarmog'idagi sahifasida e'lon qilindi.

Turnirlar noma'lum muddatga to'xtatilgan. Ularning qayta tiklanish sanasi keyinroq ma'lum qilinadi.

28 fevral kuni Isroil va AQSh Eronga qarshi harbiy operatsiya boshladi. Respublikaning yirik shaharlari, jumladan, Tehron zarbalar ostida qoldi. Islom inqilobi qo'riqchilari korpusi (IIQK) javob operatsiyasi o'tkazilayotgani haqida xabar berdi. Mehr agentligining ma'lumotlariga ko'ra, AQShning Bahrayn, Iordaniya, Qatar, Quvayt, BAA va Saudiya Arabistonidagi harbiy bazalari hujumga uchragan. Mintaqadagi bir qator davlatlar havo hududini yopdi.

Avvalroq, Yaqin Sharqdagi vaziyat tufayli Osiyo Chempionlar ligasining G'arbiy mintaqasida 2 va 3 mart kunlariga rejalashtirilgan o'yinlari qoldirilgani xabar qilingan edi.