Alisson Bekerning "Liverpul"dagi taqdiri hal bo'ldi

«Liverpul» jamoasining braziliyalik posboni Alisson Bekerning kelajagi borasida yangi ma'lumotlar paydo bo'ldi.

«Football Insider» nashrining ta'kidlashicha, «Yuventus» tomonidan qiziqishlar bo'layotgani haqidagi xabarlarga qaramay, «Liverpul» yozgi transfer oynasida Alisson bilan xayrlashishni rejalashtirmayapti. Braziliya terma jamoasining 33 yoshli a'zosi transferga qo'yilmagan, chunki «Liverpul» o'zining asosiy darvozabonini «Enfild»da olib qolish niyatida qat'iy turibdi.

Alisson 2018 yildan beri «Liverpul» sharafini himoya qilib kelmoqda. Joriy mavsumda u barcha turnirlar doirasida 29 ta o'yinda maydonga tushib, o'z darvozasidan 30 ta to'p olib chiqdi va 12 ta bahsda darvozasi daxlsizligini saqlab qoldi. Futbolchining mersisaydliklar bilan amaldagi shartnomasi 2027 yilning yoziga qadar mo'ljallangan.