"Kamp Nou"da katta o'zgarish: Mart oyidan stadion sig'imi 65 000 gacha kengayadi

"Barselona" ishqibozlari uchun xushxabar — mart oyidan boshlab qayta ta'mirlanayotgan "Kamp Nou" stadionining sig'imi 65 000 kishigacha kengayadi.

Bu "Shimoliy tribuna" deb ataluvchi qismning ochilishi tufayli amalga oshdi. Ayni damda yangilanayotgan arena o'z bag'riga faqat 45 000 tomoshabinni qabul qila oladi xolos. Kutilishicha, 15 mart kuni "Barselona" "Sevilya"ga qarshi maydonga tushganda, stadiondagi o'yinni hozirgiga qaraganda 30 foiz ko'proq muxlis bevosita kuzatib borish imkoniga ega bo'ladi.

Eslatib o'tamiz, Ispaniya chempionatining o'tgan turida kataloniyaliklar turnir jadvalida birinchi o'rinni qaytarib olishdi. Bunga Madridning "Real" klubi "Osasuna"dan mag'lubiyatga uchragani sabab bo'ldi.