Laporta: «Biz «Real»ga dars bergandik, endi «Atletiko»dan revansh olamiz»

«Barselona» prezidenti Joan Laporta Ispaniya Kubogi yarim finalining javob uchrashuvi oldidan o'z fikrlari bilan o'rtoqlashdi.

Eslatib o'tamiz, kataloniyaliklar Madriddagi ilk o'yinda 0:4 hisobida imkoniyatni boy berib, muxlislarini ranjitishgan edi. Endi seshanba kuni, 3 mart sanasida Xans-Diter Flik shogirdlari «Kamp Nou»da «matraschilar»ni qabul qilishadi.

«So'nggi uchta finalda biz «Real Madrid»ga haqiqiy futbol darsini o'tib qo'ygandik. Endi esa o'z uyimizdagi javob o'yinida «Atletiko» bilan qarama-qarshilik taqdirini o'z foydamizga o'zgartira olamiz», — deya Laportaning so'zlarini keltiradi «Managing Barca» nashri.

Uchrashuv Toshkent vaqti bilan chorshanbaga o'tar kechasi soat 01:00da boshlanadi. Ungacha esa, ya'ni bugun shanba kuni, «ko'k-anorranglilar» La Liga doirasida o'z maydonlarida «Vilyarreal»ga qarshi muhim bahsda maydonga tushishadi.