Anxel di Mariya: «Van Gal mening xatolarimdan boshqa narsani ko'rmasdi»

Argentinalik hujumchi Anxel di Mariya dunyoning eng iqtidorli futbolchilaridan biri sifatida tan olingan bo'lsa-da, uning qobiliyati hamma vaqt ham munosib baholanmagan. Di Mariyaning eslashicha, unga ayniqsa «Manchester Yunayted»da, o'zining og'ir xarakteri bilan tanilgan Lui van Gal qo'l ostida o'ynash juda qiyin kechgan.

«Men gol urardim, golli uzatmalar amalga oshirardim, lekin van Gal meni hech qachon maqtamasdi. U faqat mening xatolarimni muhokama qilardi, xolos. Agar o'yinchi bir martadan ko'p xato qilsa, u o'sha uchrashuvni muvaffaqiyatsiz deb hisoblardi. Yakunda bu mening o'zimga bo'lgan ishonchimni so'ndirib qo'ydi», — deya di Mariyaning so'zlarini keltiradi «derbyderbyderby.it».

Ma'lumot uchun, Anxel di Mariya hozirda o'zining qadrdon jamoasi — Argentinaning «Rosario Sentral» klubida to'p surmoqda. Uning o'ziga bo'lgan ishonchi esa 2022 yilgi Jahon chempionligi va ketma-ket qo'lga kiritilgan Amerika Kubogidagi g'alabalardan so'ng to'liq tiklangan bo'lsa ajab emas.