"Benfika" "Portu"ning hakam yordamida g'alaba qozonganiga shama qildi

"Benfika" o'zining "X" ijtimoiy tarmog'idagi rasmiy sahifasida Portugaliya chempionatining 24-turidan o'rin olgan "Portu" — "Aroka" (3:1) uchrashuvida belgilangan penalti vaziyatini keskin tanqid qildi.

"Yo'q joydan o'ylab topilgan penalti, soxta g'alaba. Ikki ochko sizga shunchaki sovg'a qilindi. Bu peshqadamlikni saqlab qolishni osonlashtiradi", — deyiladi vaziyat videosi ilova qilingan xabarda.

O'yinning qo'shib berilgan vaqtida, hisob 1:1 bo'lib turgan paytda "Aroka" darvozasiga penalti belgilandi. O'n bir metrlik jarima zarbasini Villiam Gomesh aniq amalga oshirib, "ajdarlar"ga g'alaba keltirdi.

"Portu" 65 ochko bilan Portugaliya chempionati turnir jadvalida peshqadamlik qilmoqda. "Benfika" esa bitta zaxira o'yiniga ega bo'lgan holda 55 ochko bilan 3-o'rinda bormoqda.