Kerrik Maunt va de Ligtning ahvoli haqida gapirdi

"Manchester Yunayted" bosh murabbiyi Maykl Kerrik himoyachi Matteys de Ligt va yarim himoyachi Meyson Mauntning holati haqida to'xtalib o'tdi.

"Maunt qaytishga juda yaqin. U maydonda ishlamoqda va tez orada jamoa ixtiyorida bo'ladi. Biz sabr qilishimizga to'g'ri keldi. Unga ehtiyotkorlik bilan yondashyapmiz, chunki mavsum finishini yuqori notada o'tkazishi uchun uning to'liq tayyor ekanligiga ishonch hosil qilishni istaymiz.

De Ligtda esa bel qismi bilan bog'liq muammo bor, tiklanish jarayoni bir oz sekin kechmoqda. Biz bu borada ishlayapmiz, lekin u maydonga qaytishdan bir oz uzoqroq. Bunday jarohatlarning tabiati shunday — beldagi muammolarda muddatlarni aytish qiyin. Ammo unda ijobiy siljish bor", — dedi Kerrik matbuot anjumanida.

Yakshanba kuni, 1 mart kuni "Manchester Yunayted" o'z maydonida "Kristal Pelas"ni qabul qiladi.