Flik Chempionlar Ligasi qur'asi natijasiga munosabat bildirdi

"Barselona" bosh murabbiyi Xans-Diter Flik Chempionlar ligasi qur'asi natijalari haqida o'z fikrlarini bildirdi. Kataloniyaliklar ushbu bosqichda "Nyukasl"ga qarshi bahs olib boradilar. Ma'lumki, "ko'k-anorranglilar" uchun ikkinchi ehtimoliy raqib "PSJ" edi.

— "PSJ" emas, balki "Nyukasl" tushganidan xursandmisiz?

— Yo'q, chunki har bir o'yin muhim. Oson uchrashuvlar bo'lmaydi, zero bu Chempionlar ligasi. "Nyukasl" ham ajoyib jamoa, biz buni ularning so'nggi o'yinlarida va ularga qarshi o'ynaganimizda ko'rdik. Oson bo'lmaydi. Mening fikrimcha, doimo raqibni hurmat qilish kerak. Hamma finalga chiqishni istaydi, biz ham. "Nyukasl" ham buni xohlaydi, — dedi Flik matbuot anjumanida.

Eslatib o'tamiz, sentyabr oyida Chempionlar ligasining umumiy bosqichida "Barselona" safarda "Nyukasl"ni 2:1 hisobida mag'lub etgan edi.