Ronaldu ispan klubi aktsiyalarining 25 foizini sotib oldi

Saudiyaning "An-Nasr" klubi va Portugaliya terma jamoasi hujumchisi Krishtianu Ronaldu Ispaniyaning "Almeriya" klubi aktsiyalarining 25 foizini sotib oldi. Bu haqda X ijtimoiy tarmog'idagi The Touchline nashri xabar berdi.

"Futbolga nafaqat maydonda, balki undan tashqarida ham o'z hissamni qo'shishni anchadan beri orzu qilardim. "Almeriya" — mustahkam poydevorga va o'sish uchun aniq salohiyatga ega bo'lgan Ispaniya klubi. Men klub rivojlanishining keyingi bosqichini qo'llab-quvvatlash uchun rahbariyat bilan birgalikda ishlash imkoniyatini intiqlik bilan kutyapman", — deya Ronalduning so'zlarini keltiradi jurnalist Ben Jeykobs o'zining X ijtimoiy tarmog'idagi sahifasida.

"Almeriya" 2025/2026 yilgi mavsum Segunda turnir jadvalida uchinchi o'rinni egallab turibdi. Jamoa 27 ta o'yinda 48 ochko jamg'argan. Birinchi o'rinda esa xuddi shuncha o'yindan so'ng 50 ochko to'plagan "Rasing" bormoqda.