Italiyalik himoyachi uchun «Real», «Siti» va «Liverpul» kurashmoqda

Madridning «Real», «Manchester Siti» va «Liverpul» klublari «Yuventus» himoyachisi Andrea Kambyazoni diqqat bilan kuzatib borishmoqda. Turin klubi shu yilning yanvar oyida futbolchining transferi bo'yicha berilgan 50 million evro miqdoridagi taklifni rad etgan edi. Bu haqda «Caught Offside» nashri xabar bermoqda.

Manbaning ma'lumotiga ko'ra, Italiya grandi 26 yoshli o'yinchini sotishga intilmayapti, biroq 60–70 million evro atrofida taklif tushsa, bu imkoniyatni ko'rib chiqishi mumkin.

Joriy mavsumda Kambyaso barcha turnirlarda 35 ta o'yinda maydonga tushib, o'z hisobiga ikkita gol va to'rtta golli uzatmani yozdirib qo'ydi. Futbolchining klub bilan amaldagi mehnat shartnomasi 2029 yilning yoziga qadar mo'ljallangan. «Transfermarkt» portalida taqdim etilgan ma'lumotlarga ko'ra, futbolchining bozor qiymati 30 million evroni tashkil etadi.