Di Gregorio ishonchni oqlamadi: «Yuventus» APLdan yangi darvozabon qidirmoqda

«Yuventus» darvoza chizig'ini kuchaytirish uchun variantlar izlashda davom etmoqda. La Gazzetta dello Sport nashrining xabar berishicha, Turin klubi Mikele Di Gregorioning o'yinlaridan ko'ngli to'lmayapti va uni yanada yuqori malakali darvozabon bilan almashtirmoqchi.

Manbaga ko'ra, asosiy nomzodlar sifatida «Liverpul» a'zosi Alisson Beker va «Tottenxem Xotspur» posboni Gulelmo Vikario ko'rilmoqda. Alisonning «qizillar» bilan shartnomasi 2027 yilda yakunlanishi, qolaversa, braziliyalik futbolchi avval «Roma»da «byankoneri»ning hozirgi bosh murabbiyi Luchano Spalletti qo'l ostida to'p surgani alohida qayd etilgan.

Shuningdek, turinliklar Vikarioning transferi bo'yicha uning atrofidagilar bilan aloqaga chiqib ulgurishgan. «Tottenxem» o'z darvozabonini 25-30 million evroga baholamoqda.