Dembele va Duening «Monako»ga qarshi javob o'yinidagi ishtiroki bo'yicha xabarlar chiqdi

«PSJ» vingeri Usmon Dembele, katta ehtimol bilan, Chempionlar ligasi doirasidagi «Monako»ga qarshi javob uchrashuvida ishtirok etmaydi.

EChL 1/8 finaliga chiqish uchun kechadigan javob bahsi chorshanba kuni «Park de Prens» stadionida bo'lib o'tadi. Dastlabki o'yinda «PSJ» 3:2 hisobida g'alaba qozongan edi, biroq o'sha uchrashuvning birinchi bo'limida Dembele jarohat olib, maydonni tark etgandi.

RMC Sport xabariga ko'ra, Dembele kechagi mashg'ulotni o'tkazib yuborgan — «PSJ» vingerning «individual mashg'ulotlarga qaytganini» ma'lum qildi. Uning bugungi o'yinni o'tkazib yuborishi kutilmoqda.

Shuningdek, yakshanba kuni «Mets»ga qarshi o'yinda sonining yaqinlashtiruvchi mushagidan jarohat olgan Dezire Due umumiy guruhda mashg'ulot o'tkazgani va «Monako» bilan bahsga tayyor bo'lishi xabar qilinmoqda.