Prestianni diskvalifikatsiya qilingan bo'lsa-da, «Real» bilan o'yinga boradi

«Benfika» hujumkor yarim himoyachisi Janluka Prestianni diskvalifikatsiya qilinganiga qaramay, Chempionlar ligasi doirasidagi «Real»ga qarshi safar o'yini uchun jamoa bilan birga yo'lga chiqadi. Bu haqda «A Bola» nashri xabar bermoqda.

Avvalroq «Benfika» UEFA tomonidan Prestiannining bitta o'yinga vaqtincha chetlatilgani yuzasidan apellyatsiya berish niyatida ekanligini ma'lum qilgan edi.

Eslatib o'tamiz, UEFA Vinisius Junior tomonidan Prestianniga nisbatan irqchilik bo'yicha qo'yilgan ayblov yuzasidan surishtiruvni davom ettirmoqda. Dastlabki xulosalarga ko'ra, argentinalik futbolchi tomonidan kamsitish holati kuzatilgan deb topilgan, shu sababli UEFA uni vaqtinchalik chetlatish haqida qaror chiqargan edi.

«Real» chorshanba kuni, 25 fevral sanasida o'z maydonida «Benfika»ni qabul qiladi. Lissabonda kechgan birinchi bahsda madridliklar 1:0 hisobida zafar quchishgan.