«Barsa» Reshfordning transferidan moliyaviy muammolarni hal qilishda foydalanmoqchi

«Manchester Yunayted»dan ijaraga olingan Markus Reshfordning «Barselona»dagi kelajagi noma'lumligicha qolmoqda. Kataloniya grandi angliyalik futbolchini 30 million evro evaziga sotib olish huquqiga ega, biroq klubning hozirgi moliyaviy holati bu mablag'ni ajratishda qiyinchilik tug'dirishi mumkin.

Transfer News Live nashrining El Nacionalga tayanib xabar berishicha, mavjud moliyaviy muammolar «Barselona»ni kutilmagan qarorga majbur qilishi mumkin: klub Reshfordni sotib olib, uni darhol boshqa jamoaga qayta sotib yuborishni rejalashtirmoqda. Ayrim nomi oshkor etilmagan klublar 28 yoshli futbolchi uchun yuqorida qayd etilgan summadan ikki baravar ko'proq haq to'lashga tayyor. Bunday kelishuv «ko'k-anorranglilar» uchun iqtisodiy jihatdan o'ta manfaatli hisoblanadi.

Joriy mavsumda Markus Reshford Xans-Diter Flik boshchiligidagi jamoa safida 34 ta uchrashuvda maydonga tushib, 10 ta gol va 13 ta golli uzatmaga mualliflik qildi.