Luis Enrike «Benfika» - «Real» o'yinidagi mojaroga qanday munosabat bildirdi? (foto)

«PSJ» bosh murabbiyi Luis Enrike Chempionlar ligasi pley-off bosqichi doirasidagi ilk o'yin — "Benfika" hamda "Real Madrid" jamoalari o'rtasidagi bahsda yuz bergan irqiy mojaro haqida fikr bildirdi.

«Bu masala bo'yicha ayta oladigan har qanday gapim hech qanday ahamiyatga ega emas», — dedi Enrike klubning rasmiy saytiga bergan izohida.

Uchrashuvning ikkinchi bo'limida o'yin to'xtatildi. Bunga sabab — «Real» qanot hujumchisi Vinisius Junior «Benfika» hujumchisi Janluka Prestianni uni «maymun» deb haqorat qilganini iddao qildi. Qayd etilishicha, o'sha paytda argentinalik futbolchi og'zini futbolkasi bilan yopib turgan.

Ushbu holatdan avval Vinisius gol urgan va uni burchak bayrog'i oldida raqs tushib nishonlagan edi. «Benfika» bosh murabbiyi Joze Mourinyu fikricha, bu harakat portugaliyalik muxlislarni provokatsiya qilgan.