Simeone "Atletiko"ning Chempionlar Ligasidagi qo'ldan chiqargan g'alabasiga munosabat bildirdi

Madridning «Atletiko» klubi bosh murabbiyi Diego Simeone Belgiyaning «Bryugge» jamoasiga qarshi kechgan Chempionlar Ligasi pley-off bosqichidagi durangdan so'ng (3:3) o'z fikrlari bilan o'rtoqlashdi.

«Matraschilar» tanaffusga qadar 2:0 hisobida oldinda borishdi, biroq mezbonlar ikkinchi bo'lim boshida ikkita tezkor gol bilan javob qaytarishdi. 79-daqiqada madridliklar yana hisobda oldinga chiqib olishgan bo'lsa-da, Belgiya jamoasi 89-daqiqada urilgan gol evaziga mag'lubiyatdan qutulib qoldi.

«Menda qiyin raqibga qarshi ajoyib kurash olib bordik, degan tuyg'u qoldi. Adolatli durang. Bizga qarshi, ehtimol, Chempionlar Ligasining eng intensiv (yuqori sur'atda o'ynaydigan) jamoasi to'qnash keldi», — deya Simeonening so'zlaridan iqtibos keltiradi Atletico Universe.

Javob uchrashuvi keyingi seshanba, 24 fevral kuni Ispaniya poytaxtida bo'lib o'tadi.