EChL. "Budyo-Glimt" o'z uyida "Inter"ni taslim etdi

Chempionlar Ligasining 2025/2026 yilgi mavsumi pley-off bosqichining dastlabki o'tish o'yini yakunlandi. Unda Norvegiyaning «Budyo-Glimt» va Italiyaning «Inter» jamoalari o'zaro bahs olib borishdi. Mazkur o'yinda Norvegiya jamoasi 3:1 hisobida g'alaba qozondi. Uchrashuv Budyodagi «Aspmyura» stadionida bo'lib o'tdi. Bahsni bosh hakam Daniel Zibert (Berlin, Germaniya) boshqarib bordi.

21-daqiqada Sondre Brunstad hisobni ochdi va Norvegiya jamoasini oldinga olib chiqdi. 30-daqiqada Franchesko Espozito javob to'pini kiritdi. 61-daqiqada Yens Petter Xyouge yana mezbonlarning ustunligini ta'minladi. 64-daqiqada esa Kasper Xyog norvegiyaliklarning uchinchi golini urdi.

«Inter» va «Budyo-Glimt» o'rtasidagi javob uchrashuvi 24 fevral kuni bo'lib o'tadi. O'yin Milandagi «San-Siro» («Djuzeppe Meatstsa») stadionida o'tkaziladi.

Chempionlar Ligasining umumiy bosqichi yakunlariga ko'ra, Norvegiya jamoasi to'qqiz ochko to'plab, 23-o'rinni egallagan edi. Italiya klubi esa 15 ochko bilan 10-pog'onadan joy olgan.