APL grandlari Ryuersonga "Barselona"dan ko'ra ko'proq maosh taklif qilmoqda

"Manchester Yunayted" va "Nyukasl" Dortmundning "Borussiya" klubi o'ng qanot himoyachisi Yulian Ryuerson uchun kurashda "Barselona"ga raqiblik qiladi. Bu haqda "Bild" nashri xabar bermoqda.

Manba bergan ma'lumotlarga ko'ra, har ikkala ingliz klubi skautlariga 28 yoshli futbolchining fazilatlari ma'qul kelgan. Ular Ryuersonni "har bir o'yinda bor kuchini berib harakat qiladigan baquvvat va namunali jangchi" deya ta'riflashgan. Ta'kidlanishicha, Angliyada Ryuersonning maoshini uch baravarga oshirib berishlari mumkin.

Joriy mavsumda Ryuerson barcha turnirlarda 29 ta o'yinda ishtirok etdi va o'z hisobiga 13 ta golli uzatmani yozdirib qo'ydi. Futbolchining klub bilan amaldagi shartnomasi 2028 yilning yoziga qadar mo'ljallangan. "Transfermarkt" portalida keltirilgan ma'lumotlarga ko'ra, futbolchining bozor qiymati 20 million evroni tashkil etadi.