Tyago Silvaning o'g'li Angliya U15 terma jamoasida debyut qildi

Braziliya terma jamoasi sobiq himoyachisi Tyago Silvaning o'g'li, futbolchi Yago Silva Angliyaning 15 yoshgacha bo'lgan o'smirlar terma jamoasida ilk o'yinini o'tkazdi. Bu haqda Tribal Football xabar bermoqda.

Kichik Silva Braziliya terma jamoasida o'ynashi ham mumkin edi, biroq u «uch sherlar»ni tanladi. Yago va uning ukasi Isago Londonda yashashadi va otasi ilgari faoliyat yuritgan «Chelsi» akademiyasida shug'ullanishadi. Angliya U15 terma jamoasidagi debyut o'yinida Yago Silva jamoadoshlariga Kipr termasini 3:0 hisobida mag'lub etishga yordam berdi.

Eslatib o'tamiz, Tyago Silva London klubi tarkibida Chempionlar ligasi, UEFA Superkubogi va klublar o'rtasidagi jahon chempionatida g'olib chiqqan.