Keyn XXI asrda penaltidan gol urish bo'yicha uchinchi o'rinda

«Bavariya» hujumchisi Xarri Keyn yaqinda faoliyatidagi yuzinchi penaltisini golga aylantirdi.

Angliyalik futbolchi Germaniya Bundesligasi doirasidagi «Verder»ga qarshi kechgan bahsda (3:0) o'n bir metrlik jarima zarbasini aniq amalga oshirdi. Ushbu uchrashuvning o'zida 32 yoshli hujumchi faoliyati davomida urgan gollarining umumiy sonini 500 taga etkazib oldi.

«Bavariya» forvardi XXI asrda penaltidan 100 ta gol urish marrasini zabt etgan uchinchi futbolchiga aylandi, deb xabar bermoqda FIFA World Cup Stats. Nuqtadan yo'llangan aniq zarbalar soni bo'yicha undan yuqoriroqda faqat Krishtianu Ronaldu (181) va Lionel Messi (112) joy olgan.

Xarri Keyn 2023 yilda faoliyatining boshidan beri sharafini himoya qilib kelgan «Tottenxem» klubidan «Bavariya»ga o'tgan edi.