"Biz ko'p qiyinchiliklarni boshdan kechirdik": Valverde "Real"ning holati va peshqadamlik haqida

"Real" yarim himoyachisi Federiko Valverde klubning murakkab davri haqida o'z fikrlari bilan o'rtoqlashdi.

— So'nggi haftalarda biz ancha qiynaldik. Ammo bu bizga ham shaxs sifatida, ham jamoa sifatida o'sishga yordam berdi, — deya Valverdening so'zlarini keltirmoqda "The Touchline".

Ispaniya La Ligasining 24-turida Madridning "Real" klubi o'z maydonida "Real Sosedad"ni 4:1 hisobida mag'lub etdi. Valverde gollardan biriga mualliflik qildi.

Ushbu natija "Real"ga 60 ochko jamg'argan holda turnir jadvalida peshqadamlikni qo'lga kiritish imkonini berdi. Biroq ikkinchi o'rinda borayotgan "Barselona"da (58 ochko) zaxira o'yini mavjud.

Ispaniya chempionatining navbatdagi turida "qaymoqranglilar" safarda "Osasuna" bilan to'qnash kelishadi.