«Yuventus» «Inter»ga qarshi o'yindan keyin hakamlik mojarosi yuzasidan bayonot berdi (video)

"Yuventus" klubi direktori Jorjo Kellini Italiya chempionati 25-turi doirasida "Inter"ga qarshi o'tgan uchrashuv (2:3)dan so'ng hakamlik borasida o'z fikrlarini bildirdi.

— Bugun sodir bo'lgan voqealardan so'ng futbol haqida gapirishning o'zi qiyin. Bugun mutlaqo qabul qilib bo'lmaydigan holat yuz berdi — bu biz bilanmi yoki boshqa jamoa bilanmi, farqi yo'q. Ehtimol, ertadan boshlab VAR tizimini o'zgartirish kerak bo'lar, chunki bunday muhim o'yinlarda shuncha xatolarning takrorlanishiga yo'l qo'yib bo'lmaydi. Mavsum boshidanoq butun dunyoga hakamlik darajasi talablarga javob bermayotganini etkazishga harakat qildik va afsuski, bugun aynan shuni hammaga namoyish etdik. Bu mavsumda bunday holatlar ko'plab jamoalar bilan sodir bo'ldi. Biz o'zgarish qilishimiz shart, Italiya futbolisida odat bo'lganidek, bu masalani keyinga surishda davom eta olmaymiz, — deya Kellinining so'zlarini Football Italia nashri keltiradi.

Eslatib o'tamiz, birinchi taym oxirida uchrashuv bosh hakami «Yuventus» himoyachisi Per Kalyulyuni maydondan nohaq chetlatdi. Ikkinchi sariq kartochka tufayli o'yinchiga qizil kartochka ko'rsatilgani bois vaziyatga VAR tizimi aralasha olmasdi. Ushbu qaror turinliklar murabbiylar shtabi noroziligiga sabab bo'ldi va natijada tanaffus paytida tunnel ostida murabbiylar shtabi bilan hakam o'rtasida to'qnashuv chiqib ketishiga sal qoldi.

Manba: stadion.uz