"Nottingem Forest" Daych qo'l ostidagi so'nggi o'yinda APLning so'nggi 10 yillik antirekordini o'rnatdi

«Nottingem Forest» jamoasi «Vulverxempton» darvozasiga yo'l topa olmadi, bu esa Shon Daychning iste'fosiga sabab bo'ldi.

Uchrashuv golsiz durang bilan yakunlandi. Bu natija «o'rmonchilar»ni aslo qanoatlantirmadi, chunki ular chempionatning asosiy autsayderi darvozasi tomon naq 35 ta zarba yo'llashdi, ammo birorta gol ura olishmadi. «Squawka» ma'lumotlariga ko'ra, «Nottingem Forest» so'nggi o'n yil ichida Premer-liga doirasidagi bir o'yinda 35 bor zarba berib, birorta ham gol ura olmagan ilk jamoaga aylandi. Oxirgi marta bunday holat 2016 yilda «Manchester Yunayted» va «Byornli» (0:0) o'rtasidagi bahsda qayd etilgan bo'lib, o'shanda «qizil iblislar» 38 bor raqib darvozasiga zarba berishgan edi.

«Bo'rilar» bilan o'yin tugaganidan ko'p o'tmay, «Nottingem Forest» matbuot xizmati Shon Daychning iste'fosini e'lon qildi.