«Manchester Siti» yulduzi chempionlik poygasi haqida: «Ertaga «Brentford»ga muxlislik qilamiz»

«Manchester Siti» vingeri Antuan Semeno Premer-liga turnir jadvalida peshqadamlik qilayotgan «Arsenal» bilan chempionlik poygasi haqidagi savolga javob berdi.

Chorshanba kuni «shaharliklar» o'z maydonida «Fulxem»ni 3:0 hisobida mag'lub etishdi. Ushbu g'alabadan so'ng «kanonirlar» bilan oradagi farq 3 ochkogacha qisqardi. Biroq Mikel Arteta shogirdlari payshanba kuni «Brentford» ustidan g'alaba qozonsa, farqni yana 6 ochkoga etkazib olishlari mumkin.

«Arsenal»ning o'yinini kutamiz. Ertaga ularning «Brentford»ga qarshi bahsini albatta tomosha qilaman. Umid qilamizki, hammasi bizning foydamizga hal bo'ladi», — dedi TNT Sports telekanaliga bergan intervyusida Semeno.

Eslatib o'tamiz, aynan Antuan Semeno «Fulxem» bilan o'yinda hisobni ochgan edi. Chempionat yakunigacha yana 12 tur qoldi.